نسخه تعزیه ترکی ضربت خوردن امام علی (ع)
اى شیوخ نهروان آگاه اولون
ائتمیون آه و فغان آگاه اولون
پیشنهادیم وار سیزه بیر گوش ائدون
بوشلیون دینى، شرابى نوش ائدون
اوچ نفر قویمور اولاق غمدن خلاص
بیر على بیر معاویه بیر عمروعاص
هراوچى گر ئولمسه واى بیزلره
اى واى اى واى اى واى اى واى بیزلره
شیخ دوّم
دوز دیور اونلار بیزى بدبختائدوب
اونلار آسان ایشلرى چوخ سخت ائدوب
هراوچى ئولسون گرک احیا گونى
بیزده بیر راحت اولاق سودا گونى
ایندى اعلان ایلسین خُرد و کبیر
کیمدى ئولدورسون اولارى بیربه بیر؟
عمروابن بکر
بیلون عمروبن بکرم من شریرم
شجاعت بیشه سینده مثل شیرم
اوزوم آمادهیم آنداولسون عصره
بو نیّتلن گئدم تا شهر مصره
گرک حیران قویام بو عام و خاصى
او یرده ئولدورم من عمروعاصى
برکةابن عبداله
ایاگروه خوارج اولون بوگون آگاه
آدیمدى هامّى بیلور برکة بن عبداله
که منده داوطلبم تیغ تیزیمى گوتورم
اوزیمى شامه او وقت مقرّره یتورم
او مسجد اُمَویده وجود معاویه نى
کثیف قانینه غلطان، ایلیم علنى
شیخ دوّم
ایندى کیمدى تا گئدوب شیرخدانىئولدوره
مسجد و محرابیده شاه ولانى ئولدوره؟
کیمده جرأت وار دیار کوفیه سارى گئده
آللَّها خاطر علینى یر اوزوندن محو ائده؟
ابن ملجم
آدیمدور ابن ملجم من دغایم
شقینون اوغلى اشقى الاشقیایم
دیار کوفه ده قان ایلرم من
علینى قانه غلطان ایلرم من
گرکدور ئولدورم من مرتضانى
قویام آغلار همیشه، شیعیانى
ابن ملجم
کوفیه آز قالورى داخل اولام
هدف و مقصدیمه نایل اولام
گَتوروب ملّتى چون جانه على
که گرکدور باتا القانه على
ابن ملجم
به به نه گوزل شهریدى بو کوفه دیارى
شهرتده ازل شهریدى بوکوفه دیارى
به به نه گوزل منطقه دى باغلارى عالى
گلزار و چمندى باشاباش چوخدا صفالى
بیر ائو گورونور گوزلریمه چوخ متعالى
بیر آى دولانور اوردا که یوخ گویده مثالى
ابنملجم
گئدوم او ائوده بیرآز آللَّهاعبادت ائدوم
صباح اولونجااویرده قُران قرائتائدوم
قطام
گون باتان چاقى شتابان قاپونى کیمدى دوون
گئت گوراى دازقلى وردان قاپونىکیمدى دوون
وردان
آدیوى ایله بیان من تانیوم
یوزیوى ائتمه نهان من تانیوم
نه سوزون واردى منه ایله بیان
چک یوزوندن او نقابى بو زمان
ابن ملجم
آدیم ابن ملجم، اوزوم خسته یم
مسلمانم آللَّهه دلبسته یم
بوائوده قویون استراحت ائدیم
اوروشلوقدى قرآن تلاوت ائدیم
وردان
آنّونداموهور ردّى علامتدى بویور گل
تسبیحون اوزون سقّلون آفتدى بویور گل
ائوصاحبى اول بانوى زیبادى برادر
من نوکرىام او منه اولىدى برادر
گئت اوندان اجازه اوزون آل زاده ملجم
منده سنیلن باهم اونون یانینه گلّم
ابن ملجم
السّلام اى بانوى عالى مقام
گلمیشم بوردا سنه مهمان اولام
اى قطام آیاندندى آغلوسان
آتش آهیله سینه داغلوسان؟
قطام
خوش گلوبسن ابن ملجم بو ائوه
چوخ زماندور که دولوب غم بو ائوه
نهروان جنگینده اى مرد پلید
هم آتام هم قارداشیم اولموش شهید
اونلارى یاد ایلدوقجا آغلارام
یاسلیام من باشه قاره باغلارام
ابن ملجم
ایلوسن جارى یوزه گوزیاشیوى
ئولدوروبدور کیم آتا، قارداشیوى؟
قطام
بیله بولمه ابن ملجم، شاه عادلدور على
شاه ظالمدورکه مظلوملاره قاتلدور على
ایلیوب تیم الرّبابه قومینى بیربیر شهید
مناوگوندن قالموشام بوائوده تنهاو وحید
ابن ملجم
ایا قطامه بو یرده سنه که دوشدى گوزوم
نمازى ترک ائلدیم حُسنوه وریلدیم اوزوم
سنون جمالیون آلوب دین و عقلیمى الدن
بو قدّ و قامتیوه من وریلموشام دیلدن
گوزلّر ایچره سنى بى مثال بیلّم من
منیله ایلمسون ازدواج ئولّم من
قطام
ایندى که عاشق اولوبسان سن منه اى بد مزاج
اوچ دنه شرطیله سنلن ایلرم من ازدواج
ابن ملجم
نه شرطون اولسا باش اوسته عیان ائت
اورکده ساخلامابیربیر بیان ائت
قطام
اوّلى اوچ مین درم پول اى عزیز
ایکّمنجى بیر غلام و بیرکنیز
اوچّومنجى سهمیلى طوفانیدور
یعنى مهریّهم علینون قانیدور
ابن ملجم
اى قطامه کیمدى اُول میرولانى ئولدوره
هئچ کیمین یوخ جرأتى شیرخدانى ئولدوره
آنداولا هم جانیوه هم جانیمه اى خوش خرام
من على بن ابیطالب آدیندان قورخورام
قطام
قوتما اى ملعون نظردن سالمارام
من ایکى شرطیمى سندن آلمارام
تک بودور شرطیم اونى ئولدورگیلن
سن منه اوز عشقوى بولدورگیلن
ابن ملجم
من زنازاده بو دهره گلموشم
بیل بونیّتله بو شهره گلموشم
آلموشام شمشیریمى مین درهمه
مین درمده وئرموشم زهر غمه
یاخشى سودا ایلدیم سودا گونى
شرطیوى اجرا ائدم احیا گونى
وردان
ایاابن ملجم رفیقم سنه
گوزیوى آچوب باخگیلان بیر منه
بو قطّامیه فخریلن نوکرم
سنه من بوایشده کمک ایلرم
شبیب
منده بو ایشده سنه یار اولارام
گر چه یاخچى بیلورم خوار اولارام
من عداوت سوونین چشمه سىام
من علینون قانینون تشنه سىام
ابن ملجم
ایکوزده وئرون دست بیعت منه
بهشت اهلى سوز یوخدى منّت منه
گئدون حقّ اوزى یاور اولسون سوزا
اوروشلوق قویون چاتسین اون دوقّوزا
امام اوّل
اولده حضرت پروردگاره حمد اولسون
خداى لم یزل و کردگاره حمد اولسون
اوروشلوق آیىدى بو، ماهِ صوم و ماه صلات
دیون محمّد و آل محمّده صلوات
اوروش دوتون یادوزا آجلارى سالون یاران
فقیریلر حالینى بیر خبرآلون یاران
اوروش دوتان گئدهجاقدور بهشته عقباده
اوروش ییَن قره اوزدور هر ایکّى دنیاده
گرایسته سوز تاپا سوز هر ایکى جهاندانجات
دیون محمّد و آل محمّده صلوات
امام اوّل
اوغول حسن دورایاقه دوشوبدى باشیمه شور
بیان قیل که بوآیدان نچه گونى سووشور؟
امام دوّم
فدا اولوم سنه اى آللَّهین ولىسى بابا
بابام رسول امینون ازل وصىسى بابا
سؤالیوین باباجان بو زمان جوابى بودور
بو آیین اى شه عالم اون اوچ گونى سووشور
امام اوّل
اوغول حسین دور ایاقه منه زمان آزالیر
بیان ایله بو آیدان گوروم نقدرى قالیر؟
امام سوّم
سنه قربان اولوم اى شاه عالم
جمالون گون، جبینون ماه عالم
اوروش آللَّهین امریدور توتولسون
قالوراون یدّى گون بوآى قوتولسون
حسنین
نیه سارالدى، جمالون بابا
بیزى آغلاتدى، سؤالون بابا؟
غملى باخورسان، مگر نولاجاق
سنه بیز قربان، مگر نولاجاق؟!
امام اوّل
بیلورسوز اى جماعت حقّه یارم
على آدیمدى شیر کردگارم
بیلورسوز ناطق قرآن منم من
رسول اللَّهه مثل جان منم من
بیلورسوز حامى دین مبینم
بیلورسوز من امیرالمؤمنینم
بیلورسوز جانشین احمدم من
یگانه آفتاب سرمدم من
بیلورسوز کاتب قرآن منم من
بیلورسوز مظهر یزدان منم من
بیلورسوز منقبت دریاسىام من
علىّام شیعهلر مولاسىام من
امام اوّل
اى شیعهلر بو بحریده طوفانه آزقالور
عمریم چاتا بو دهریده پایانه آزقالور
چکسین قلنجین آز قالورى اشقى الاشقیا
آغ سقّلیم بویانه قیزیل قانه آزقالور
اوغلوم حسن حسینه هاموزحرمت ایلیون
اولسون یتیم بو ایکى دُردانه آزقالور
امام دوّم
یاامیرالمؤمنین جانلار فدا اولسون سنه
جان ومالیلن مسلمانلار فدا اولسون سنه
اى باباجان دهریده وآللَّهى اللَّه شیرى سن
نه فقط شیرخداسن آللَّهین شمشیرى سن
کیمده وار جرأت سنه سارى قلج چکسون بابا
کیمده وار قدرت یراوسته قانوى توکسون بابا
امام اوّل
بو کوفه مسجدینه باشیمین آخار قانى
ائدر او قان ولى تضمین دین و قرآنى
بیلون که قاتلیمین آدى ابن ملجمدور
قیامتین گونى حتماً یرى جهنّمدور
امام دوّم
قارداش حسین سن آغلاما
آهیله سینه داغلاما
زینب ائشیتسه بو سوزى
آغلار گجیله گوندوزى
امام سوّم
قارداش حسن اى مجتبا
سال قولاّریوى بوینوما
ایکى قارداش قوجاقلاشاق
بوردا دویونجاق آغلاشاق
امام اوّل
اى کوفه نین جماعتى بوگوزیاشاباخون
دقّتله صاق صولومداایکى قارداشاباخون
مندنصوراحسینیمه چوخ حرمت ایلیون
بیرگون گلر، اوگونده هاموزدقّت ایلیون
پیغمبرین بالاسیدى واللَّهى بو حسین
منع ائتمیون فراتى دیَن وقته سو حسین
امام اوّل
یارب به حقِّ، ثارِثارُاللَّه
جمع آمینَ آمین، آمین یااللَّه
ائتمه شیعه نى دوزیولدان گمراه
جمع آمینَ آمین، آمین یااللَّه
یاربّ به حقّ طاها و زهرا
جمع آمینَ آمین، آمین یااللَّه
سربلند ایله هرایکى دنیا
جمع آمینَ آمین، آمین یااللَّه
مریضلرینه یارب شفاوئر
جمع آمینَ آمین، آمین یااللَّه
هردردلرینه یارب دوا وئر
جمع آمینَ آمین، آمین یااللَّه
امّ کلثوم
شکراولسون آللَّهامنه مهمان گلوربابام
جانیم بابام گلن یولاقربان، گلوربابام
احیانین اوّل آخشامى افطاره آز قالیر
بولمم ندندى حالى پریشان گلوربابام
امّ کلثوم
سلام اولاسنه اى شاه انس و جان بابا
آنام کیمى منه دنیاده مهربان بابا
دوباره کلبه کلثومى ایلدون گولشن
گولینه باش چکر البته باغبان بابا
امام اوّل
قوناقوم بوگجه اى قیزیم علیکِ سلام
یواش یواش آزالیر قورتولا بو ماه صیام
آتا وظیفه سیدور باش چکه بالالارینا
گوزل بالا سحر آللَّهیمه قوناق اولارام
امّ کلثوم
یارب ائویم غریبه چراغاندى بوگجه
عشق عندلبلرینه گولوستاندى بوگجه
هربیرگجه اولوردى بیر اولادینه قوناق
نوبت چاتوب بابام منه مهماندى بوگجه
امّ کلثوم
من فدا اولاّم بابا گوزیاشیوه
بوگجه یاتمام دولانّام باشیوه
قوى قدم رنجه بابا افطار ائله
سُفرهمى غرق یَمِ انوار ائله
امام اوّل
بو سفرهده گورورم ایکّى جور غذانى قیزیم
فراموش ایلمه مسکین و بینوانى قیزیم
مگر گوروبسن آتون ایکّى جور طعامى ییه
مگر گوروبسن على پُربهالباسى گیه؟!
امّ کلثوم
کاملاً فرمایشون دوزدور بابا
سفرهده بیر سوتدى بیر دوزدى بابا
امام اوّل
یتیملر آتاسى مرتضایم اى کلثوم
فقیرلر آقاسى پیشوایم اى کلثوم
دوزیلا من آچارام افطارى بو جامى گوتور
قاباقجابو سوتى بیر عدّه بینوایه یتور
امّ کلثوم
سنون کیمى بابا بیر مهربان هایاندا اولار
همیشه یاده فقیرى سالان هایاندا اولار
امام اوّل
واردور یرى هر دمده چکم دیلدن آه
لا حول و لا قوّة الاّ باللَّه
امّ کلثوم
بابانیه بو گجه بیر دقیقه یاتمورسان
باشوندان عشق وصال نگارى آتمورسان
کچوبدى یارى گجه آز قالور اذانه بابا
دونوبدى رنگ رُخون رنگ زعفرانه بابا
امام اوّل
وقت اولوبدور امّ کلثوم مسجده سارى گئدم
تایاتانلارى نماز صبحه من بیدار ائدم
داى یولومى گوزلمه چونکه گلنمم بیرده من
ذوالفقارى جان کیمین کربوبلایه ساخلا سن
زبانحال مرغابى ها
اى آللَّهایگانه ولى گئتمه مسجده
وى شیر حىّ لم یزلى گئتمه مسجده
گئتسون سنى شهید ائلیر اشقى الاشقیا
ائوده نمازیوى قیل على گئتمه مسجده
امام اوّل
اى بهشت قوشلارى سیز آغلامیون
آتش آهیله دیل داغلامیون
دیوسوز گئتمه، ولى گئتمهلىام
ردّاولون بو یولومى باغلامیون
زبانحال حلقه در
عالیدى یاعلى ئولومه همّتون سنون
چوخ چوخ چتیندى ماخلقه فرقتون سنون
گئتمه بو دفعه مسجده ائوده نماز قیل
دیلسیزلرى گتوردى دیله محنتون سنون
جبرئیل
سلام اولا سنه اى شاه عالم امکان
اولا اذان سسیوه جان جبرئیل قربان
اذان دئمه اوجادان ائتمه عالمى دلخون
اویانماسین یوخودان ابن ملجم ملعون
امام اوّل
اوزو قویلى یاتما ظالم، دورایاقه گل نمازه
بیلورم عدو اولوبسان،اوخداى بىنیازه
بیلورم نهگیزلهدوبسن بوعبانین آتداشیطان
یتشوبدى وقت مُوعد، چاتاسان مرامه الان
جبرئیل
یتیشدى آفت جان باغبانه واویلا
که اسدى باد ستم گولستانه واویلا
حسن حسینه دیون مسجده یتورسون اوزون
گلوبدى یرگووین اهلى فغانه واویلا
یخلدى دین مبینین ستونى مسجدده
اوجالدى ناله سسى آسمانه واویلا
بو ماجرادن ائدون باخبر اباالفضلى
دیون که شیرخداباتدى قانه واویلا
حسنین و عباس
سنه خنجر وردى کیم؟ آى بابا جان بابا
ایلدى بیزى یتیم، آى بابا جان بابا
امام اوّل
اوغول حسن، باغلامنیم، باشیمى آغلاما
صبره دعوت، ایله بنى، هاشیمى آغلاما
امام دوّم
یانّام بابا بو غصّهلى مطلبه مطلبه
آغلیارام حُسینیلن زینبه زینبه
امام اوّل
قلبیوى حسین داغلاماآى بالا جان بالا
صبرایله سنده آغلاماآى بالا جان بالا
امام سوّم
مظلوم بابادردیم چوخدى یتیمم یتیمم
قوى آغلیوم آنام یوخدى یتیمم یتیمم
ابالفضل دولدوروب گوزین آى باباجان بابا
غیرتدن ئولدورور اوزین آى باباجان بابا
امام اوّل
حسن حسین کیمى سنده ادبلى سن عبّاس
الیوى خنجره آتماغضبلى سن عبّاس
حضرت عباس
بابااجازه بویورسون بو تیغیمى چکرم
تمام دشمنوین قاننى یره توکرم
منه بویور سنى بو حالته سالان کیمدى؟
بالالاریوى بوگونده یتیم قویان کیمدى؟
امام اوّل
منیم غضبلى بالام بو محنده صبر ایله
حسن حسین کیمى عبّاس سنده صبرایله
عبّاس
نجه گوروم دایانوم قان ایچیندهایندى سنى
نجه گوروم الى قوینوندا قارداشیم حسنى
چخوبدى شیعهلرین عرشه شور و شینى بابا
نجه گوروم گوزى یاشلى آخى حسینى بابا
سنى بو حالیله گورسه اگر باجیم زینب
باخانمارام یوزینه من ایا امیر عرب
امام اوّل
صبرایله اوغول غم و بلایه
گلمه بئله نى کیمین نوایه
زینبله حسینه خاطر عبّاس
شمشیریوى ساخلا کربلایه
اى قارداشینون گوزل وزیرى
ساخلا نظرونده سن بشیرى
( مصطفی ایمانی)
وبلاگ بسیارزیبایی داری خیلی خوشم آمداگه دوست داشتی به وب منم سربزن خوشت اومدلینکش کن